الطربوش

هو تقريبا كدة ما بقاش تاج دة بقي طربوش!! لأن بقاله قرن و انا لسه فايقة دلوقت بعد ما بقي( ديموديه) بناء علي طلب الاستاذ محمد عبية اللي هي اوامر انا حارد علي الطربوش و الصراحة انا مكسوفة من نفسي جدا الناس كلها ردت عليه بقالها 32 سنه و تلات شهور و انا لسة بقول يا هادي معلش يا جماعة الطريق كان طويل و بس استنيت لما الرحال تكمل عشان اشدّها و اديني ركبت الناقة و لسة واصلة!.
هل انت راض عن مدونتك شكلا و موضوعا؟
ج:- و الله بالنسبة للموضوع انا عندي حالة مزمنة من عدم الرضا عن ما افعله دائما حاسه ان كل حاجة عملتها كان ممكن اعملها احسن من كدة و دايما حاسة اني لسة ما كتبتش اللي عاوزة اكتبة و لسة ماعملتش اللي نفسي اعمله اما بالنسبة للشكل فبعد ما شفت المدونات اللي بجد و بحق و حقيقي محرجة من الفقر و البؤس اللي فيه المدونة بتاعتي بس الصراحة انا عاجباني المدونة البدائية بتاعتي جدا لأنها شكلها يدّي علي قديم و عتيق و انا من عشاق الحاجات القديمة و لونها بيحسسني اني بكتب علي ورق بردي باحس انها رومانسية اوي –ايوة انا واحدة بتلاقي رومانسية في ورق البردي- حد عنده اعتراض؟!؟
هل تعلم اسرتك الصغيرة بامر مدونتك؟
ج:اه عارفين انا قلت قبل كدة بس الظاهر ماحدش سمع و محدش قراها!!.
هل بتتكسف تقول لاصدقائك انك عندك مدونة؟
اتكسف!! هوة مش انتو بتتكلموا عن مدونة برضه؟! لا مش موضوع كسوف بس اللي يعرف اني عندي مدونة من اصحابي يعد علي نصف اصابع اليد الواحدة لأنهم مش مهتمين بالحاجات دي
هل شقلبت المدونات حياتك للاحسن؟
مش لدرجة شقلبة لكن مانكرش انها غيرت فية شوية حاجات و التغيير عامة حلو سواء كان التغير احسن او اوحش او حتي اكرم او امجد! يعني حاجة مفيدة ان الواحد يتنقل من بستان لبستان تشوف زهور جديدة و مختلفة و ممكن برضة تشوف دبابير و نحل لكن حاتبعد عنهم!و لكن في الاغلب بتخرج من البساتين المختلفة و انت معاك بوكيه حلو من ناس فعلا حلوة
هل تكتفي بفتح صفحات من يردون عليك في مدونتك؟
مش دايما ساعات بارد علي علّق عندي بس و ساعات باتجول علي حسب المزاج و الوقت و ظروف الكلية
ماذا يعني لك عداد الزوار؟
و الله العداد دة اختراع جميل جدا فعلابس غالبا مش حاحطه عندي لانني مش حانبسط لما الاقي عدد الزوار بالسالب!!.
هل حاولت تخيل شكل اصدقائك المدونين؟
يعني انا لن اضحك علي نفسي و علي الناس و اقول الكلام المكرر ان الشكل لا يهمني
طبعا الروح اهم لكن لن حاكدب و اقول ان الشكل برضة مابيهمنيش لكن فعلا الروح هي في اول قائمة اوليوياتي لانها اهم حاجة في الانسان فعلا و بعدين في ديل القائمة ييجي الشكل و انا حاطاه في ديل القائمة عشان اصلا الشكل دة حاجة بتاعت ربنا و الواحد –انا باتكلم عن نفسي- يشوف نفسه الاول قبل ما يتكلم !! و ان المثل يقول" اللي "و شه " من ازاز...!!. و انا عامة بحدد الشكل من خلال كلام و روح و افكار اللي قدامي يعني خلاص ياثبت انه فلانة سكلها حيبقي كدة و فلان شكله كدة و غالبا بتيجي معايا صح
هل تشعر ان مجتمع التدويت مجتمع منفصل عن الواقع؟
العموم في هذا الموضوع ظلم . لان هناك مدونات ممتزجة و معجونة بالواقع وايضا هناك مدوننات يعيدة ومنفصلة عن الواقع و لكن انا لا اعطي نفسي الحق في ان انتقد اللي اختار الانفصال لأن ممكن يكون صاحب المدونة متشعب في الواقع في حياته لكن يكون اختار ان مدونته تكون معزوله و تكون تعبر عن شخصه فقط نوع من انواع التغيير. و لكن عن نفسي احب المدونة تكون مراية للواقع اللي نحياه و تعبر عن مجتمعنا لكن في النهاية كل واحد حر اللي عاوز بينفصل عن الواقع ينفصل و اللي عاوز يرتبط يرتبط ...بس يبقوا يعزمونا علي الفرح بأه!!.
هل تري فائدة للتوين؟
ايه الاسئلة التقليدية دي يا جماعة؟!.. زي مثلا ما حد يسأل ايه فايدة الكتاب؟ و لا ايه فايدة أكرة الباب؟!
طب كلمتين سخاف" التدوين متنفس لكل روح تتوق للتعبير عن نفسها و ايدولوجية تفكيرها و بعثرة مكنون ذاتها في صورة راقية فتشرئب هامتها عندما تري ما يجيش بطرقات روحها قد وجد له طريقا للظهور في هيئة حروف تراها و يراها الاخرون" مش قلت كلام سخيف!!؟
هل يزعجك وجود نقد بمدونتك؟
لا طبعا بالعكس لكن عندما يكون نقد فيه تعبير عن الاراء و مناقشة و اختلاف حتي لكن بصورة متحضرة فيكون نوع من انواع التواصل المحترم لكن التعليقات اللي لا هدف لها الا الهجوم من اجل الهجوم و ساعات بيكون فيها الفاظ خارجة لا تعد تواصل تبأه حوار ديموقراطي من بتوع الحزب الوطني!!ز
هل تخاف من بعض المدونات السياسية؟ و هل صدمك اعتقال بعض المدونين؟
لا المدونات السياسية لا تخيف الا لو عينت الدولة مخبر علي باب كل مدونة يختبأ لك و يقوم هوووب ماسكك و عامل فيك اللي انت عارفه بأه!! لكن من ناحية الصدمة اه فعلا اتصدمت لان انا طيلة عمري فاكرة الحكومة اغبي من انها تقرأ و انها تهتم بالثقافة او اي شيء به تفكير .و ايضا احسست انه حتي الكلمة اصبحت محفوفة بالمخاطر و عدنا لايام عصر محاكم التفتيش و اتهام الاخر بالهرطقة – اللي هية المعادل لاهانة الريس دلوقت- كفيل انه يقذفه ليس فقط خلف الشمس لا في مجرة تانية اصلا!!.
هل فكرت في مصير مدونتك بعد وفاتك؟
اسئلة تفرح و الله!! بس متهيألي مش حايبقي في وقت افكر في المدونة ساعت ما حاموت حايبقي في حاجات اهم بكتييييير و ربنا هوة اللي يسترها. دة غير ان المدونة بتاعتي يعني مش ميراث ارشيدوق النمسا و لا الكونتيسة براون !! يعني الميراث اما يتوزع بالعدل او نعمل مزاد علني و اللي عاوز يشيل!
احب اسمع ايه؟
ايه اسئلة القناة التالته دي؟!! الاغاني التي احبها فعلا في البروفيل اما بالنسبة لدلوقت احب اسمع اغنية" صمت القبور" لفريق " مسلوبي اللسان و الارادة" و التي تذاع علي علي قنوات السكتة الدماغية " الاعلام المصري سابقا" من اغلب انخاء المخروسة- بالخاء- و خصوصا ايام الانتخابات وجلسات مجلس الشعب المصفق الفرح المبتهج!!
و ايضا اغنية " امشي بأه" و باهديها للي مبلط في الخط من ربع قرن و كمان اغنية " كداب يا خيشة" و باهديها لكل الوزراء و المسؤلين الذين امطرونا بالوعود الوهمية و نسوا ان وعد الحر دين عليه
اما الاغنية اللي بجد نفسي اسمعها و دايخة عليها هي اغنية طفولية جدا اغنية نيللي "الفراش" اما فراشة صغيرة لابسة بلوزة منقطة علي جونلة مشجرة.." ليها ذكريات خلابة من ايام الصغر و الضفاير لو حد يعرفها و لقاها يقولي
اسئلة من نوع اخر
هل انت عقلاني ام عاطفي؟
يعني مزيج من العقل و العاطفة علي حسب الموقف الجانب اللي يكسب الصراع يظهر بس غالبا باكون عاطفية و دي طبيعة عند البنات و جايبالهم الكافية
صف شخصيتك
يااااه السؤال اللي باسمعه من ايام اعدادي خصوصا من اصحابي الاتي يهتممن بنوعية الاسئلة مثل " اعرف ملامح شخصيتك" و " تعرف علي شخصية شريك حياتك" و " خصائص برجك" و طول عمري مابحبش ارد لان شخصيتي مش مهمة للدرجة بس المرة دي حارد
1- طفولية في بعض الاحيان لسه باحب اشتري عرايس لغاية دلوقت
2- جدّ اوي برة البيت و مع المجتمع الخارجي عايشة دور دوغري باشا الحمش لكن مع صحابي الحقيقة بتظهر و " كل شيجن بينكشفن و يبان" !! يعني معاهم بابقي علي طبيعتي شوية شقاوة علي حبة لسعات مجنونة و باحب النكت البايخة و المقالب!و رومانسية حبة حلوين
3- رغاية اوي مع اللي احب اتكلم معاهم بس . و صامته كالاسماك في اي مجتمع جديد او مش مرتاحة فيه باحسسهم انهم بيكلموا مولطن اصلي من فبيلة زندولوجا من جزيرة الواجادوجو في المحيط العويسي!.
4- اكره الدوشه و الزحمة و النور العالي و ....الكسكسي!!.
اي حيوان شبيه ليه؟
حيوان !!ما شاء الله دي اخرتها! انا عامة باحب كل الحيوانات الاليفة و مش حازعل لو اي حد شبهني باي صفة فيهم لكن عن نفسي انا شبه حيوان الهيبا هوباس المنقرض!!.
ما لونك المفضل؟
ممم.. الازرقات و الموف و الابيض.. و لون الراسب اللي بيتكون نتيحة تفاعل الكلسيوم و الماغنسيوم مع الاحماض الامينية و المعدنية و المحاليل المتعادلة عند اضافة اكسيدات الفلزات و الاوكسالات المترسبة و يتم رؤية اللون الناتج بمرشح رؤية للاشعة تحت الخضراء!!.
هل انت اجتماعي اكثر ام منعزل؟
انا اجتماعية علي حسب نوع المجتمع ...يعني لو مجتمع متأقلمة معه اتكلم و اشارك في الحوار اما لو لا احب وجودي في هذا المجتمع أعيره نصف انتباه و نصف اذن و نصف عين و ثمن لسان! و المشاركة تكون بهمهمة غير مفهومة
ماذا يشكل اصدقائك بالنسبة لك؟
لا يوجد كلمة تعبر عن اهميتهم بالنسبة لي ببساطة بدونهم ممكن اكتئب و اتجنن
هل انت مرنبط بعائلتك؟
انا من ناحيتي مرتبطة جدا و حريصة اني احافظ علي هذا الارتباط لكن طبعا كل ما الواحد بيكبر نقط الاختلاف بتزيد لكن احاول اقرب وجهات النظر قدر المستطاع
هل انت عصبي ام هادئ؟
انا في العادي هادئة و لا احب الصوت العال و عشان كدة ناس ممكن تقول عليه باردة بس في ساعات لما باوصل لاخر طاقة احتمال باتعصب في الاول تعصب داخلي و لو الوضع ماتحسنش بيبقي خارجي
هل تفضل فصل الشتاء ام الصيف؟
شتاء طبعا شتاء للابد! من و انا صغيرة نفسي الاجازة تبقي في الشتاء لان باحب غموضه و كابته و امطاره و حزنه الرهيف و شعورك و انت تستيقظ تصلي الفجر و تحس ببرودة البلاط عليقدميك و انك تمشي في البرد و تكتك و تري البخار الابيض الذي يخرج من فمك
اخر مرة بكيت فيها؟
بالنسبة للناس اللي عايشة في مصر لازم كل يوم نبكي ثلاث مرات قبل الاكل و بعده و اوقات اثناء الاكل عندما تجد مسمار في رغيف الخبز الذي تأكله!! اما بالنسبة ليه من قريب و السبب لا دة بقي شخصي جدااااا و ممنوع الاقتراب و التصوير!
من يلعب هذة اللعبة مكاني؟
انا متهيألي اخر واحدة لسه فاكرة تلعب اللعبة دي بس ممكن يلعبها الجيل القادم اصحاب الخمس سنوات لما يشدّوا هما كمان الرحال و يركبوا الناقة و يوصلوا بالسلامة!1